II संजय उवाच II एतस्मिन्नंतरे कृष्णः पार्थ वचनमब्रवीत I दर्शयन्निव कौंतेयं धर्मराजं युधिष्ठिरं II १ II
સંજય બોલ્યો-એ સમયે શ્રીકૃષ્ણ અર્જુનને યુધિષ્ઠિરનું દર્શન કરાવતા બોલ્યા-'હે અર્જુન,જો પેલા રહ્યા તારા વડીલ ભાઈ યુધિષ્ઠિર.જો પેલા કૌરવો તમને મારી નાખવા દોડી રહ્યા છે ત્યારે પાંચાલ યોદ્ધાઓ યુધિષ્ઠિરનું રક્ષણ કરવા તેમની પાછળ દોડી જાય છે.દુર્યોધન યુધિષ્ઠિરને મારી નાખવા ઈચ્છે છે એટલે કૌરવ સૈન્ય તેમને પકડવા ને મારવા તેમની સામે ધસી રહ્યું છે પણ તે સર્વને ભીમસેન અને સાત્યકિએ અટકાવી રાખ્યા છે.દુર્યોધનનું સૈન્ય એવું તો મહાભયંકર અને બલિષ્ઠ છે કે તેમના બાણોના ચોટમાંથી કોઈ છૂટી શકે નહિ.આ સમયે યુધિષ્ઠિર સપડાયા હોવાથી હું માનું છું કે તે કાળના મુખમાં જ સપડાયા છે.
II संजय उवाच II ततः पुनः समाजग्मुरभीताः कुरुसृंजयाः I युधिष्ठिरमुखाः पार्थाः सूतपुत्रमुखा धियं II १ II
સંજય બોલ્યો-તે પછી કૌરવો તથા સૃન્જયો નિર્ભય થઈને સામસામા ભેટ્યા,તેમાં કર્ણ અને યુધિષ્ઠિર અગ્રેસર હતા.કર્ણ અને પાંડવો વચ્ચે રૂવાં ખડાં કરી દે તેવો ભયંકર સંગ્રામ ચાલુ થયો કે જે યમરાજના રાજ્યમાં વધારો કરનારો હતો.એ રીતે લોહીની છોળોવાળો તે તુમુલ સંગ્રામ ચાલી રહ્યો હતો ત્યારે સંશપ્તકોના શૂરા યોદ્ધાઓ થોડાઘણા હજી વધ્યા હતા.તે વખતે ધૃષ્ટદ્યુમ્ન અને બીજા પાંડવ મહારથીઓ કર્ણ સામે ધસ્યા.કર્ણે તે સર્વને અટકાવ્યા ને તેનો ધૃષ્ટદ્યુમ્ન સાથે સંગ્રામ શરુ થયો.
